Luk 14 | ASO | STEP | Holise' gamene mau' Izesu' aza Halisaio' veti ve naba'ine mali'mi noso' nite' no neivo aza inite' ma do gopo ilingumu' ve li gizebo igi ningi minani'.

Luke 14

Izesu' Aza Evene' Oko'no Lulu Izive Ma Do Lamine' O-dine'

1 Holise' gamene mau' Izesu' aza Halisaio' veti ve naba'ine mali'mi noso' nite' no neivo aza inite' ma do gopo ilingumu' ve li gizebo igi ningi minani'. 2 Ne'mine igi nizavo a'mingu' nene ve ma oko'no lulu izive nene Izesu' neida avita minine'. 3 Neivo Izesu' aza Halisaio' vesi ido' lou' gamazilo' sukulu naba li monikevesi nene ti' lo longo' o-ngidine': Leze lou' gamazite ne'mo nadive lo neive. Holiseku' nene laza evene' do lamine' o-ngedelobe ma do lamine' o-ngedamolone. 4 Ne'mine lavo ingine gamazi'inesi nomivo minani'. Ne'mine ikevo oko'no lulu izive nene do lamine' o-do hulo-davo vine'. 5 Ne'mine ogo ti' lo lo-ngimine': Lengikuti' ve mali'mi dongi ize've nehe bulumaka' ize've nehe holise' gameneu' galeseu' leme neivo lite' lo vo gono do gelelehe' ogo hulo hazala o-damilido' o neihe. 6 Ne'mine lavo ingine a'mine gamazilo' nene ngeli di ti'ni li-imamani'.

Okode Do'mo Lemo Minaa' Monovomu' Izesu' Line' Gamazi

7 Ne'mine ikevo a'mine noso' nite' nalisa ave ingine nene evene' naba gelo holomo lamineto' minelone li minilisa navo Izesu' aza ningo gamazi ma ti' lo lo-ngimine': 8 Lingine nene ve mali'mo noso' nite' nabamu' elese molo-lengemavo niigi ma nene holomo lamineto' nene gomu' igi minamilo. Lengikisi makato' elese molo-lengede nolive ma lengi' lingivile' igi dizi nilizani' nene 9 aza elese molo-lingidive ne'mo ogo ti' lo lo-lengemeleseive: Lingine minani' holomolo' nene me vete minilizaze. Otilo. Ne'mine lavo lingine longovozo hili holomo mehe'nida nene minikelizaze. 10 Ve mali'mo noso' nitekumu' elese molo-lengemavo niigi ma holomo mehe'nida nene vi minilo. Ne'mine igi nizavo elese molo-lingimive ogo ningo zogone, holomo lamineta dizi minilo lo lo-lengedeleseive. Ne'mine ogavosa a'mine noso' niteta maka' vi minaveti ve'nido' nene mo dizi minave minilisave. 11 Ido' ne'mine noluvoni' nene nanitekumu' ve. Ve ma oko'ine di dizaa' ave muki' engi' nene O'moso'mo do leme-ngedeleseive. Ido' ve ma oko'ine di limi minaa' nave engi' nene O'moso'mo do dize-ngedeleseive.

Noso' Niteto' Evene' Elese Molaa' Monovomu' Lo-ngimine' Gamazi

12 Ne'mine lo lo-ngemo noso' nitekumu' elese molo-dive nene ti' lo lo-imine': Noso' nite' gize vata' ogo molo evene' elese molalosa gelo ma geze alinge' elese mili-gidikevo ge noso' nitekalo' golo hizani' gelalize. Geze zuho gihile nilizahe ido' zogo veka zuho nilizahe ido' geze nanida heneni aleve minaa' nilizahe ne'mine aleve muki' nene elese molo-ngedamozo. 13 Asi noso' nite' gize vata' ogo evene' elese molalosa gelo ma nene goho' gahali' nilizahe gebili si'zi miniliza aleve nilizahe ido' ve'ine likive nilizahe ne'mine alevevo' nene elese molo-ngedezo. 14 Ne'mine iline' nene ingine a'mine noso' niteto' nene ngeli golo hizamavo O'moso'mo evene' lisihe' hilanguti' do ote-ngedeline' gamenelo' nene meni gemeline' nenako ne'mine iline' ne'mo gaza mine lamine' iline' akalo' minelesane.

O'moso'mo Elese Molo-ngedavo Gilisa Goseleka Lilizave Nene Noso' Nite' Naba nGemelido' Nene Mo Amilisave Lo Isilaele' Aleveti Monovo Lo Soto' Ogo Aneza Gamazi Line'

(Mataio' 22:1-10)

15 Ne'mine lavo noso' nite' makato' ni minave mali'mo gelo Izesu'ni ti' lo lo-imine': O'moso'mo gizebo ingu' vo holo mino noso' nite' no minelonive leli' nene mine lamine' olone' akalo' mine molo none. 16 Ne'mine lo lavo nemu' aneza gamazi Izesu' ma ti' lo lo-ngimine': Ve mali'mo noso' nite' naba do va'va' olosa evene' muki' nene elese molo-ngimine'. 17 Elese molo-ngemavo noso' nite' naliza gamene nene alitavo gonou' ve nene a'mine elese molo-ngidive nene lo-ngemelive lo imiselavo vo ti' lo lo-ngimine': Lingine noso' nite' nene mo do va'va' ogaze. Alo. 18 Ne'mine lo lo-ngimine'za ingine mukito' vamoloniko lii api' igi amiliza monovomu' abelenga li-imika' li-imika' ani' ve. Mali'mo nene api' ogo ti' lo lo-imine': Agae, naza nene misubo ma meni hizuvoni' nenako a'mida vo ningeloni' o neive lo guvelesi ve nene lo-emezo. 19 Ne'mine lo lavo mali'mo ti' lo line': Agae, naza nene gono dalizani' bulumaka' teni meni hizo hulo nouvoni' nene gono lamine' dalizahe damilizahe lo ningelesa volosa nouze. Nemu' guvelesi ve lo-emezo. 20 Lavo mali'mo ti' lo line': Naza nene mo idise a'ne vene' dosa nouvonako nemu' nene vamoloni' o neive lo line'. 21 Ne'mine likevo gonou' ve aza lani' gamazi nene vo noso' nite' naba gize vata' ive nene lo-emavo aza izebolo' goloso molavo gonou' ve nene ti' lo lo-imine': Gaza nene numuno ebe' nabala aka ngomo' nabaku' nene vo goho' gahali' aleve ido' gize'ine a'ine goloso ine' ido' ve'ine likine' ido' gebili aleve nene ngele'mizo ano lo imiseline'. 22 Ne'mine lo imiselavo gonou' ve aza a'mine lido' ogosa ogo gizebo ve've nene ti' lo lo-imine': Ve nabo, gaza lo-nedaine' ma'mine nene mo okuvoni'za minaa' holomo linge nene lumo haza neive. 23 Ne'mine lavo noso' nite' gize vata' ive ve naba ne'mo gonou' ve ti' lo lo-imine': Gaza aka nabalo' vaa' ido' mine akau' vaa' ogo evene' nilizani' nene amuzo molo ngele'mizo do oganivo numu'ne nene vai' lilive. 24 Naza ti' lo nolo-gimuve: Naza gomu' elese molo-ngiduvoni' aleveuti' nene hamolitesi neni' noso' nitekuti' nene mo namilisave lo line'.

Izesu'ni E'meto Volo Ma Gele Vevese Mino E'meto Volone' Gamazi

(Mataio' 10:37-38)

25 Evene' muki' goloso nene Izesu'ni e'meti nivavo aza mine velepe' izo ti' lo lo-ngimine': 26 Ve ma nenita igi gi'mizi minilizave ingine nene ize'ningine me'ningine vene' izipaha'ine ingine zuhomu' ido' engi' oko'inemukisi gilavo dizavo nenikumu' gilavo ngomo ma lemo mineline' nene neni' izipaha'ne lili' igi minamilisave. 27 Ido' ve ma mulumo inite' i-lidi lohoto' zalo' libilikelizave li gili a'manapa igi ne'metamilizani' nene neni' izipaha'ne zuho lolo' igi minamilisave. 28 Ido' lengikuti' ve malite numuno ha'na dizo mineline' numuno ma gizelone li gili ma ingine nene a'mine numuno gizelone' meni've nene vo dahe damihe li gomu' gati gilaa' nave. 29 Ne'mine igi gati ningi gilamilizani' nene alinge' posi di hizisa numuno gizilizani' inite'ine nene geto osu' lavo ngeli gizi osu' lamilizani' ogavo evene' ingine ningi gize' i-ngidi 30 ve mene gosoho' nite' di numuno ha'na di hizi ti' aha hulikevo go'nupo o neive lilisave. Nemu' nene ne'mine ikelizaze. Numuno ha'na gizili ma gomu' nene moni'ine nehe numuno giziliza inite'ine nehe nene vo dahe damihe li gati ningi gilaa' nave. 31 Ido' guvelesi ve mali'mo neze zuhosi guvelesi ve mali'mi zuhosi lovo hizelone lo geleline' nene olihe lovolo' vamo lovo di alizave engi' nene tuvedi tauseni (20,000) ami nizavo eze nene teni tauseni (10,000) amivo' do neine' nemu' engi' nene ha ngivile' olobe amolobe lo gomu' nene lulou' ize' molo gala geleleseive. 32 Ido' gala gilivo ngeli ngivile' amilizani' ine' nene lovo ve ingine hoto' olihe navo evene' ma lovo hizamoloningumu' nene gamazi do lisihe' olone lo ngimiselaa' neive. 33 Ido' a'mine'mine igi neni' ne'metilisa ilizani' nene ingine nanite' naniteli'mo kostim o-ngedelihe gomu' nene ningi gili minisavo' nene ne'metilisave lo noluve. A'mine'mine ogo lengikuti' ve mali'mo ei' inite' mata've muki' mehene emamiline' nene neni' izipaha'ne minamoloseive.

Leli' E'metelonido' Lisihe' O Mineline' Monovotemu' Nene Guvolo' Lo Molo Aneza Gamazi Line'

(Mataio' 5:13; Maleko' 9:50)

34 Guvo nene lamine' neine'za a'mine guvo nene goloso ogavo lanite've osu' liline' nene gohi ma lamine' amoloseive. 35 A'ne'mine guvo nedunu' ne'mine mana'mine inite' ma amolosunako mo do hulolosune. Nemu' lingine gatine gili nge laa' ave ma nii ma nene gili lamine' igi gililo.